Adeiladu dyfodol cryfach i gyn-filwyr hŷn newydd fynd o nerth i nerth
Cyhoeddwyd ar 13 Rhagfyr 2025 09:34 yh
Mae cwrs e-Ddysgu Adeiladu Dyfodol Cryfach i Gyn Filwyr Hŷn yn parhau i ennill momentwm, ac yn helpu gweithwyr proffesiynol ledled y DU i ddeall a chefnogi cyn-filwyr hŷn yn eu cymunedau’n well. Yn dilyn llwyddiant y prosiect tair blynedd arloesol hwn, a ariannwyd gan Ymddiriedolaeth Cronfa Cyfamod y Lluoedd Arfog o fis Ebrill 2024 i fis Ebrill 2027 ac a arweiniwyd gan Age Cymru Dyfed – mae ein tîm cyn-filwyr wrth eu bodd yn rhannu’r newyddion - bod Cyngor Dinas Milton Keynes ac Ymddiriedolaeth Sefydledig GIG Ysbyty Prifysgol Milton Keynes bellach wedi ymuno.
Mae'r cwrs bellach yn cael ei gynnal ar blatfform hyfforddi mewnol Cyngor Dinas Milton Keynes, gan ei wneud yn hygyrch i 1,000 o staff ychwanegol a chryfhau cefnogaeth i gyn-filwyr hŷn ledled yr ardal. Wedi'i gynllunio i fod yn gryno ac yn effeithiol, mae ond yn cymryd rhwng 30 a 45 munud i'w gwblhau. Mae ar gael yn Saesneg a Chymraeg, ac yn sicrhau hygyrchedd ledled Cymru a thu hwnt. Wedi'i ddatblygu yng Nghymru gyda chyrhaeddiad ar draws y DU, mae'r hyfforddiant yn hyrwyddo dull cyson a thosturiol o ofalu am gyn-filwyr hŷn. Dywedodd llefarydd o Gyngor Dinas Milton Keynes ac Ysbyty Prifysgol Milton Keynes:
“Rydym yn falch o’r gefnogaeth a ddarparwn i gymuned Lluoedd Arfog ein dinas. Rydym yn nodi ac yn cofnodi statws cyn-filwyr mewn mannau mynediad allweddol ac mae gennym dîm Lluoedd Arfog ymroddedig sy’n helpu cyn-filwyr a’u teuluoedd i gael mynediad at wasanaethau ychwanegol. Mae’r ddau sefydliad yn cydweithio’n agos ac yn dal Gwobr Aur y Weinyddiaeth Amddiffyn. Mae ymgorffori e-Ddysgu Cyn-filwyr Hŷn Dyfed Age Cymru ar ein platfformau hyfforddi mewnol yn cryfhau gwybodaeth ac ymwybyddiaeth staff. Rydym wrth ein bodd o fod y cyngor cyntaf a’r ymddiriedolaeth GIG gyntaf i gynnig yr adnodd gwerthfawr hwn a byddem yn annog eraill i wneud yr un peth.”
Gwybodaeth am y prosiect
Mae oddeutu 650,000 o gyn-filwyr dros 80 oed yn y DU, ac mae llawer ohonynt yn wynebu heriau unigryw sy'n gysylltiedig ag iechyd, llesiant ac ynysu cymdeithasol. Crëwyd y fenter hon i fynd i'r afael â'r heriau hynny drwy roi hyfforddiant hygyrch am ddim i staff rheng flaen sy'n gweithio yn y GIG, awdurdodau lleol a'r sector gwirfoddol. Mae'r cwrs yn rhoi'r wybodaeth a'r hyder i weithwyr proffesiynol i adnabod cyn-filwyr hŷn, deall eu hanghenion a'u cysylltu â chymorth lleol priodol. Wedi'i gynllunio'n feddylgar i fod yn ymgysylltiol ac yn empathig, mae'n cefnogi dull ataliol trwy gryfhau cysylltiadau cymunedol a lleihau'r tebygolrwydd o ail-dderbyniadau i'r ysbyty.
Gwneud gwahaniaeth parhaol
Mae canlyniadau disgwyliedig y prosiect yn cynnwys dull mwy cydgysylltiedig, ledled y DU, o ofalu am gyn-filwyr. Drwy sicrhau bod cyn-filwyr yn cael eu hadnabod o fewn y gwasanaethau, bod marcwyr cyn-filwyr yn cael eu hychwanegu at eu cofnodion meddygol a'u bod yn cael cynnig cysylltiadau â rhwydweithiau cymorth lleol, mae'r cwrs yn cryfhau gofal yn y gymuned.
Mae'r dull gwell hwn yn helpu i leihau unigedd ac unigrwydd, yn gwella llesiant ac yn lleddfu'r pwysau ar wasanaethau iechyd a gofal drwy leihau arosiadau ysbyty ac aildderbyniadau. Mae cysylltiadau cryfach â sefydliadau'r trydydd sector hefyd yn sicrhau bod cyn-filwyr yn derbyn cefnogaeth gyfannol y tu hwnt i leoliadau clinigol.
I ddarganfod rhagor o wybodaeth am brosiect Adeiladau Dyfodol Cryfach i Gyn-Filwyr Hŷn, ewch i’n tudalen we bwrpasol: