Rydym yn falch iawn o gyhoeddi bod Age Cymru Dyfed wedi ennill gwobr Arian yng nghategori Cyflogwr y Flwyddyn yng Ngwobrau Cyn-filwyr Cymru 2026 ar 8 Gorffennaf. Mae'n anrhydedd i ni dderbyn y gydnabyddiaeth hon ac rydym yn parhau i fod wedi ymrwymo i gefnogi cyn-filwyr yn ein cymunedau. Mae'r wobr yn cydnabod ein hymrwymiad i gefnogi cyn-filwyr ac yn adlewyrchu ymroddiad ein staff a'n gwirfoddolwyr wrth helpu cymuned y lluoedd arfog ledled gorllewin Cymru.

Mae Gwobrau Cyn-filwyr Cymru, a gynhelir i gefnogi Cronfa Elusennol y Fyddin ac Elusen y Llynges Frenhinol a'r Morlu Brenhinol, yn dathlu cyflawniadau cyn-filwyr, cyflogwyr a sefydliadau o bob cwr o Gymru. Llongyfarchiadau i bawb a wnaeth gymryd rhan! Wrth siarad yn y digwyddiad, a noddwyd gan Sierra Nevada Mission Systems UK, dywedodd Jim Glass, Swyddog Cyn-filwyr yn Age Cymru Dyfed:

"Mae ein Tîm Cyn-filwyr yn Age Cymru Dyfed yn hynod falch o fod wedi cael eu henwebu a'u dewis fel rhai o'r unigolion sydd wedi cyrraedd y rownd derfynol yng Ngwobrau Cyn-filwyr Cymru. Mae'r Wobr Arian hon yn gydnabyddiaeth wych o'r gwaith caled a wneir bob dydd i wella profiad y cyn-filwr.

“Fel Cyn-filwr, mae’n fraint i mi fod yn gweithio, yn cynorthwyo Cyn-filwyr ers 2021 ar draws sawl sefydliad. Mae’n hanfodol bod yr unigolion hynny sydd wedi gwasanaethu eu gwlad, naill ai fel gwirfoddolwyr neu fel rhan o’r Gwasanaeth Cenedlaethol, yn cael y cymorth sydd ei angen. Yn Age Cymru Dyfed, mae’n anrhydedd i ni sicrhau bod Cyn-filwyr hŷn nad ydynt efallai’n llythrennog ar y rhyngrwyd yn cael yr un cyfleoedd â’u cymrodyr iau.

“Rydym yn ymdrechu i sicrhau bod gan Gyn-filwyr hŷn ddyfodol gwell, boed drwy ein modiwl e-ddysgu am ddim ar gyfer gwasanaethau rheng flaen neu drwy ein prosiect Cronfa Dreftadaeth y Loteri sy’n cofnodi straeon Milwyr Cenedlaethol Cymru. Mae cofnodi eu straeon yn golygu bod gan eu hanes personol lais bob amser.”

Mynychwyd y noson wobrwyo gan uwch gynrychiolwyr milwrol, Comisiynydd Cyn-filwyr Cymru, aelodau o’r Gwarchodlu Brenhinol, y Gwarchodlu Cymreig a’r Llynges Frenhinol a sefydliadau ar y rhestr fer, gan gynnwys Gareth Pennell, a dderbyniodd Wobr Cyflawniad Oes, a Steve Owen, a gydnabyddir fel Model Rôl y Flwyddyn, Codwr Arian Elusen Filwrol y Flwyddyn a Phencampwr Gwobrau Cyn-filwyr Cymru.

Gwybodaeth am Brosiect y Cyn-filwyr yn Age Cymru Dyfed

Mae Age Cymru Dyfed wedi ymrwymo i wella bywydau cyn-filwyr hŷn ledled Sir Gâr, Ceredigion, a Sir Benfro.

Mae ein prosiect Adeiladu Dyfodol Cryfach i Gyn-filwyr Hŷn wedi datblygu modiwl e-ddysgu am ddim i helpu gweithwyr proffesiynol rheng flaen, gan gynnwys y GIG, awdurdodau lleol, sefydliadau trydydd sector a phrifysgolion, i ddeall a chefnogi cyn-filwyr yn eu cymunedau yn well. Mae'r cwrs hefyd ar gael trwy wefan Cynghrair Iechyd Cyfamod y Lluoedd Arfog ar gyfer ymddiriedolaethau'r GIG ledled Lloegr.

Ochr yn ochr â hyn, mae ein prosiect Cronfa Dreftadaeth y Loteri Genedlaethol yn cadw straeon Milwyr Cenedlaethol Cymru a wasanaethodd rhwng 1946 a 1963. Mae eu profiadau'n cael eu cofnodi a'u harchifo yn Llyfrgell Genedlaethol Cymru, sy’n sicrhau bod eu hanesion personol yn cael eu cadw ar gyfer cenedlaethau'r dyfodol. Mae'r prosiect hefyd yn cynnwys adnoddau addysgol i helpu myfyrwyr heddiw i ddysgu am brofiadau Gwasanaeth Cenedlaethol ar ôl y rhyfel. Gyda'i gilydd, mae'r prosiectau hyn yn helpu i sicrhau bod cyn-filwyr hŷn yn derbyn y gydnabyddiaeth, y gefnogaeth a'r etifeddiaeth y maent yn eu haeddu.